الثورة غاية أم وسيلة ؟؟ ج2

طب بس استنى ...اصل فيه موجة ثورية تالتة....

ماشى يا عمنا تتوقع حتحصل ليه ومين حيعملها و مين حيقودها ؟؟

اللى حيعملها اللى سقفوا للسيسى وغنوا تسلم الايادى وحيلاقوا نفسهم مش عارفين يأكلّوا ولادهم ...يعنى قصدك ثورة جياع ...أه ...طب من حيركبها ويقودها ..احنا

لا بس به يا ريس اللى حيعملها هم العوام والناس البسيطة (و ده بناء على مبدأ بونابرت العسكرى القائل بان الشعوب بتزحف على بطونها ....طب خدت بالك أن المبدأ عسكرى ...طب بالله عليك يا أهبل متوقع أن السيسى حيغفل عن المبدأ ده ..حتقولى أه وارد ...طب بص بقى معايا كده فى الدولة حواليك حتلاقى ان تصرفات الدولة كلها بتصب فى صالح أخماد أى محاولة لأغلاء الاسعار ....مثال الاعتمادات البنكية بالدولار مفتوحة لأستيراد السلع الغذايئة ...المجمعات الاستهلاكية زى مصرية ومجمعات الاهرام بتنزل خصم بيوصل لحوالى 25% على بعض السلع الغذائية الجيش لسه بيوزع العيش من المخابز بتاعته لمنافذ بيع منتجات المصريين فبالتالى مش حيحصل ثورة قوامها الجوع...و لو فرضا حصل فالقبض العشوائى شغال والناس معندهاش مشكلة معاه ...والقتل موجود والناس حتقولك خليهم ينضفوا ..ولو الدنيا هاجت أكتر فاللى حيركب هم البلطجية وانت غالبا حيتم دبحك لانك راجل ذو مبادى ومش بتخلص على طول وبرضه الدولة حتعرف تركب تانى )

الثورة فى رأيى وسيلة هدفها الاصلى كان الدعوة للأصلاح وابراز سخط الناس من توجهات الحكومة الرأسمالية الفجة وفجاجة تصرفات جمال مبارك وشلته و طاعة أجهزة الدولة لهم دون صفة رسمية وافتتائهم على حقوق الناس و ممارسهتم المالية التى اضرت بالناس وبالصالح العام
ده أول ما الناس قالت يا ثورة ...وكان هدف الثورة فى الاول هو الضغط على النظام من أجل الاصلاح وليس أسقاط النظام

النظام تغابى وتهاون فى سفك الدماء بدلا من الاستماع لمطالب الناس فالناس كرد فعل للدم ولقلة أدب الداخلية قلبت معاهم بنرفزة وسخط شديد من الاستهانة بالدماء والاستهزاء بمطالبهم وعدم الاعتبار بهم كأنهم ورث أو متاع ونظام أخبطوا رأسكم فى الحيط (و خلى بالك ان منظر الدماء المسفوكة على قارعة الطريق لأو ل مرة و فى البدايات كان صادم للغاية بعد شوية الناس أتعودت عليه وخلى بالك أن بعد كده الناس أصبحت مؤيدة ليه بعد ما أتعودت عليه )كرد فعل

السؤال دلوقتى عشان ما توهش منى وماتوهش من نفسك "من التيه والصياع " : أنت دلوقتى عاوزة أيه من السلطة الحالية ؟؟ أهدافك أيه ؟؟ وحتعملها أزاى ؟؟ وايه الادوات اللى حتساعدك ولازم تسعى لمتلاكها وتستخدمها صح و فى التوقيت المناسب ؟؟  ويا ترى الزخم الشعبى حتعرف تعلمه وتكسب الناس لصفك تانى ؟؟

ولا هيا ثورة ثورة....على طرقة زنقة زنقة وشوية افكار تحجرت فى دماغك ومصمم تكمل عليها حتى لو ثبت عدم اهليتها ؟؟

الثورة غاية أم وسيلة ؟؟ ج1

الصدمة التالتة لكل واحد لسه فاكرنى ثابت على عهد الثورة

فى البدء كان  الاستقرار ثم البحث عن أفضل الأوضاع المعيشية و فى النهاية سيكون البحث عن الاستقرار
راقب حياتك وشوف نفسك لما تقعد تتنقل من مكان لمكان او من بيئة معينة لبيئة أخرى أو من مجال عمل لمجال اخر ...شوف حقتدر تستحمل الكلام ده ورا بعضه بسرعة وحتستحمله كتير ولا حييجى عليك وقت وتقول كفاية كده أنا زهقت عاوز أعرف رأسى من رجليا وعاوز أستقر ( مش كل الناس 100 % أنما الغالبية العظمى حتقول كده ).

البوست ده موجه لكل أصحابى اللى لسه فاكرين ثورى و حاعيش ثورى و أموت ثورى وخلاص (مش بقولك الليلة دى بنفور الناس من عندنا )

ينفع الثورة تبقى غاية ...يعنى أعمل ثورة  وتفشل ...قوم كمان مرة أعمل ثورة فتفشل ...فأقوم أقعد اعمل فى ثورة ورا ثورة على أمل أنها تنجح وفى الاخر برضه حتفشل ؟؟ طب ليه حتفشل ...لأنك وانت بتعمل مظاهرة او مسيرة بتعتقد أنها ثورة أنما انت فعليا مش بتخطط لثورة

طب الثورة محتاجة هيكل تنظيمى ينط و يركب على السلطة لما نخلص من الناس الوحشة  ونخلص عليها .....طب ظبّطت كوادر تقنية تساعدك على تنفيذ خططك لما توصل للحكم ...طب انت عارف أن فورة الناس مبتقعدش كتير وانك لازم تستغلها صح وفى حاجات مظبوطة ؟؟ مش تقعد كل شوية تعمل مسيرة وتنادى الناس عشان حاجة عبيطة كل مرة وفى الاخر الناس تفرهد منك وتسبلك
هنا انت عندك لخبطة فى المسميات ... اللى بينظم لثورة شاملة أول حاجة بيقعد يخطط ليها ويشوف مقومات نجاحها وازاى يضمن تأمين هذه المقومات من أجل الركوب على رأس السلطة (من المقومات المطلوبة على سبيل المثال لا الحصر تكوين تجمعات مدنية من كوادر ثورية وتجمعات أخرى عسكرية وان تكون الدولة فى قمة ضعفها وتفككها فعليا لا ظاهريا (مش زى م الداخلية وامن الدولة والمخابرات و الجيش أوهموك بكده ) وان يكون لديك كوادر تقنية و مليشيات عسكرية والأستيلاء على منصة أعلامية تضمن لك أكبر أنتشار ووصول الى الجماهير والاستيلاء على المبانى الحكومية التى ترمز الى الدولة والى سيطرتك عليها ومن اكبر المقومات على سبيل المثال لا الحصر الحصول على تاييد كاسح من كتلة عظمى من الجماهير وده يكاد يكون الحاجة الوحيدة اللى انت كانت عندك وده كان سلاحك الوحيد جنب سلاح الاعلام الدولى  وانت السلاحين دول أتاخدوا منك ...بغباء منك وبذكاء من الاخرين ..فسلاح الجماهير تم استنزافه بدعوة الناس كل جمعة لأى سبب مش عاجب الثوار  وعلى مطلب واحد وكان فراردا ...اذن انت فرهدت الناس على مطالب فردية ..لم تعمل أى تنظيم يجمع الناس اللى نفسه تصلح بجد وقعدت تتفشخر بلا مركزية الثورة وكل شوية حد يطلع برأى ...أينعم هما تعبوا كتير عقبال ما عرفوا شوهوا كل من تصدر المهد الثورى من الشباب أنما فى الأخر قام بتلميع كام شاب وتصدريهم انهم هم قلب الثورة وبعدين تم تشويهم ..يعنى علملولك قادة اعلاميا  وقام يتشويهم يعنى النقطة اللى انت كنت مستند عليها فى لامركزية الثورة وفاكرها عقبة قصادهم هما تجاوزوها  أشرب بقى ..أهى المركزية كسبت قصاد اللامركزية فى مصر )

السلاح التانى هو الاعلام ..تم استعادة السيطرة على الاعلام الخاص و تم التواصل مع بعض قنوات الاعلام العربى كالعربية وام بى سى)
أذن انت نسيت البداية ..ونسيت الدنيا تطورت ازاى و تجمدت عند الثورة المستندة للجماهير ..ومعرفتش حدود قدراتك أيه وفى الأخر عاوز تكسبها بالثورة

فى البدء كان الضغط من اجل الاصلاح ثم الثورة ثم السياسة ثم الانقلاب المدعوم شعبيا ..طب انت عاوز تعمل ثورة ومعكش اى من مقومات نجاحها ؟؟

وهو بذكاء حطك فى خانة انك مش عارف تعمل مسيرة براحتك من غير ما يحط عليك ..وانك اقصى امانيك تطلع المساجين وتتظاهر براحتك لعل وعسى الجماهير العريضة تضم عليك (وده مش حيحصل خلاص ....جيم أوفر)

طب تحب أصدمك صدمة تانى

مبدئيا اللى مش أخوان بس بيحترموهم أو مش أخوان بس بيتعاطفوا معاه ...دول بالنسبة ليا فاقدى الاهلية العقلية (ناقصين عقل يعنى) .

البعض بيحتج أن احنا مشفناش من الاخوان بشاعات كتيرة زى ما شوفنا من الجيش
حضرتك مش لازم انتظر اشوف النهايات عشان اقول ان الاخوان وحشين ...فى حاجة اسمها أستقراء البدايات عشان أقدر أعرف أوصل لتصور للنهايات   .....   مش لازم أفضل أصر بكل غباوة انى لازم اشوف النهايات الكارثية عشان أحلف انهم فعلا وحشين ..ده أسمه تخلف عقلى وده بيتعاكس مع نقدك وتريقتك على الحكومات السابقة اللى كانت بتتحرك فقط بعد حدوث الكارثة وليس قبلها بأهمالها استقراء الواقع وتحليل البيانات وما ستؤدى اليه ووضع تصور مسبق للسيناريوهات السيئة قبل ما تحصل ووضع خطط قابلة للتنفيذ لكل سيناريو...قوم بقى لما الدولة العميقة والمخابرات علمت كده بس ده للأسف حصل مع حبابيبك الاخوان قوم أنت زعلت وقعدت تتحجج بأن احنا كان لازم نشوف كوارث مع الاخوان قبل ما نحكم عليهم وقبل ما حد يتحرك ....

يا أخى ده حتى المثل بيقول أن العينة بينه ..(ومش مقصود بالعينة الحاجات العبيطة اللى كان بتم تصديرها للناس البسيطة  وتهييج الناس عليها ... و ده أنا حأتكلم عليه كمان شوية ) انما انت مصّر نلبس لحد الأخر وماشى بطريقة الفورة من 100 ..أنما هما ماشيين بطريقة كش ..مات وانت كنت عارف كده واستغبيت ...تعيش وتشرب

طب الموضوع مش محتاج تغلط فى الناس وتقول فاقدين عقل

لا يا سيدى و ناقصى أهلية كمان لو أنا قاضى لا أقبل شهادتهم ...ليه؟

أولا اثبت الاخوان فى كذا موقف ما يأتى :

الأخوان أولا و أخيرا

الاخرون ربنا مسخرهم لينا لخدمتنا ولا عهد لهم ولاذمة ..مؤتمر فيرمونت مثالا

كام مرة عندما أحس الاخوان بقوتهم ابتدوا بتكلموا على هذا الاساس وان محدش فارق معاهم غير اللى أقوى منهم

احنا الوحيدون اللى على الحق المبين والباقى فى النار وبالتالى لا حقوق لهم عندنا  حاجة كده زى نظرة اليهود لباقى شعوب الارض" خلى بالك الكلام هنا مش عن اليهود ..الكلام عن الأخوان"

طب كام مرة الاخوان عملوا حاجات غبية
أديك مثال : كلنا نعتقد أن الاخوان لم يقوموا باعمال ارهابية الا ان تصريحات بعضهم (البلتاجى فى رابعة مثالا بأن ما يحدث فى سيناء لن يتوقف الا بتوقف الانقلاب ) وشماتة البعض منهم عند حدوث العمليات الارهابية ..اليست كل هذه التصريحات تجعلهم قابلين للمسائلة السياسية والجنائية باعتبارهم  مشتركين بالتحريض أو بعدم التنديد بما يحدث ؟؟

طب أنا لو فى الحكم أسيبهم ولا انتهز الفرضة واحاسبهم ....

طب كام مرة الأخوان ركبوا عليك وعلى شغلك ؟؟ وفى الاخر برضه رايح توطى ليهم ؟؟

اى مسيرة كانت بتنزل تنديدا باى حاجة ومطالبة بأى حاجة كحفظ الدماء أو الضغط للألتزام بخارطة الطريق أو التوقف عن الأعتقالات العشوائية و اى مطالب أخرى ليس من ضمنها عودة مرسى ) الم يكن الاخوان يركبون على هذه المسيرات ويرفعون صورة مرسى ويصوروا هذه المسيرات والمظاهرات على انها دعوة لعودة مرسى؟؟

طب ليه دايما يذكروا رابعة ولا يذكرون أعتصام النهضة ؟؟ اللى كان برضه ضد الانقلاب ؟؟

طب كام مرة شفت أزداوجية الاخوان فى التعامل (مثال اى فتاة فى مظاهرة ضدهم عاهرة وصليبية وكافرة أنما بناتهم حرائر وجواهر وهم فقط ولا احد غيرهم مثال الشرف والفضيلة ...)
بعد كل ده كله لما تتجاوز عن هذا الكلام وتغض الطرف عنه وتختار الا تراه ...ترانى أراك كامل الاهلية العقلية ؟؟
وعندما تتعود لوحدة الصف معهم بدلا من وحدتها معهم داخل السجون (وهو ما اترجمه بمطالبتك ليا أن أوطى تانى للأخوان عشان يركبوا ) أترانى بعد كل هذا اراك كامل الأهلية ؟؟ ...حتى لو الهدف والنتيجة التى نسعى لها واحدة (وهو ما قلت أنى أهتم به كما قلت سابقا ) ..فماذا بعد ذلك ..ماذا بعد هذا الهدف المرحلى

فى التجربة السابقى كان الهدف المرحلى فى وقت ما متأخر من الثورة هو اسقاط النظام  ...فماذا بعد اسقاط النظام ؟؟ ماذ يحدث لى ؟؟ وماذا فعل الاخوان بكل من وقف معهم وتعاون معهم ؟؟ ..عاوزنى أعيد التجربة تانى وفى هذه المرة حاقف عريان بلبوص من غير ضهر ؟؟
أفلا تعقلون

سقطة فكرية مقابل التزام أدبى

أدى أول صدمات النهاردة

طب مش أنا أمبارح كنت ضد طلوع اى رئيس مصرى لطيارة العاهل السعودى

طب أيه رأيك أنى أضطريت أهاجم السيسى امبارح على الموضوع ده لأن كنت فى موقف اخلاقى لأن لو مرسى كان عمل كده كنت فشخته حرفيا فالتزامى الأدبى أنى كان لازم أهاجم السيسى

بس انا شخصيا أهتمامى بالنتيجة وبالهدف ...حتى لو أضطريت أنى مش أبوس رأسه لأ أنى أبوس اى حاجة تانية .....

انا النهاردة كمصر فى أضعف حالاتى لو انا رئيس مصر معنديش مشكلة أعمل أى حاجة عشان أقوم على رجليا كبلد  وبعد شوية لما اقف على رجليا حأعرف أستعيد مكانتى كويس أوى  ....

شوفت بقى الشيزوفرنيا اللى انا فيها ....نتيجة أنى كنت حأفشخ مرسى (لاننا كنا بعد ثورة كان احد مطالبها هو الكرامة وكان مرسى محسوب على الثورة ومكانش ينفع ان مرسى بتمثيله للثورة اللى السعودية كانت ضدها خوفا على نظام الحكم مكنش مرسى يعمل كده.....طب دلوقتى ؟؟...دلوقتى انت نظام أول حاجة عملتها أنك سندت ضهرك ع السعودية فعملت كده و أنا شخصيا لو كنت مكان السيسى كنت عملت كده البدايات متسقة مع الافعال ....طب ليه هاجمت السيسى؟؟ ....عشان انا كنت حأفشخ مرسى لو عمل كده وعشان انا مكنتش حابب ان حد يزايد عليا فى النقطة دى ...بس الصراحة مهاجمتى للسيسى مكانتش منطقية ...لذا أعتبرها سقطة فكرية ليا فى سبيل ان محدش يزعل منى او يزايد عليا وده غالبا أخر مرة أعمل فيها حاجة زى كده أن شاء الله

حتسيبى الشال ولا أعورك؟؟

 فى أحدى الليالى الشتوية كنا عائدين أنا وأختى للمنزل وكانت أختى ترتدى على كتفيها شالا جميلا من الصوف قانى اللون ذو شراسيب مضفرة بعناية ويوحى برقى لا شك فيه

نزلنا من الخردة "السيارة سابقا بعد ان أكل عليها الدهر وشرب" فى اتجاه البيت وسبقت أختى بخطوتين للأمام وفجاة وجدتها أضطربت وبقت مش على بعضها  وابتدت تصرخ

فى البداية ظننت أن صرصورا أو قط قد سار بجوارها وافزاعها او انها جالها شد عضلى فى رجلها وحتقع فصرخت طلبا للنجدة

رجعت للورا لأسندها واهش القطة ففوجئت بالشال ينسحب للورا من على كتفيتها!!!

ببص لورا شوية ففوجئت بجرو صغير عجبه الشال بشراشيبه فقرر أن يحتفظ به لنفسه ...دعنا نتفق أنه كلب بيفهم وعنده ذوق رفيع

أخذ الكلب الشال ثم أنطلق به كالرصاصة

أسيبه؟؟...لأ طبعا جريت وراه لحد ما مسكته" الشال طبعا مش الكلب هو انا عبيط ؟ امسك الكلب فيهبشنى أو يعضنى".

عدنا الى البيت حيث اجريت الأسعافات الاولية لأختى"عاينت الأصابة فوجدتها جروح سطحية لا تستدعى أخذ مصل الكلب وغسلنا الأصابة بالماء والصابون والماء الدافى والبيتادين.

فى اليوم التالى حدث الأتى "الخدوش + الماء الدافى أديا الى ظهور كدمة ذات الوأن مرعبة للغاية وبما ان حواء عامة تميل الى ان ترتعب من أدنى شىء فان كل من أختى وأمى قررا وبكل حزم انها عضة كلب كبيرة

قد نتشكك معا فى حقيقة شهادة الطب التى أحملها ولكنى بلا جدال لدى عينان و أوكد لك انها كانت خدوشا سطحية.

تحولت الخدوش السطحية الى عضة ومع انتقال الاخبار الى المحيط العائلى تحولت العضة الى هبشة واتسعت دائرة الاتصالات والتواصل العائلى حتى  أنى لم أكن لأستغرب لو اتصل بى أحدهم قائلا "أنا سمعت عن اللى حصل لأختك عملتوا ايه فى الكلب اللى كل نص رجلها ....و أختك عملت العملية فى رجلها ولا الدكتور قال مفيش أمل ...هه طمنى عملتوا أيه؟"

 مرحبا بك فى مصر

الشكل المحتمل للأتفاق الجديد بين الجيش و الأخوان والتيارات السياسية كلها بوجه عام بعد 30 يونيو 2013 و مذبحة رابعة

الكلام على دعوة تحالف الشرعية للمفاوضات مع العسكر و خاصة عدم ذكر عودة مرسى يؤكد كلامى اللى عمال أقوله من 3 أشهر أنهم لازم حيقعدوا مع بعض فى الاخر على ترابيزة واحدة 
يا رب بس مايتّفقوا علينا
وسلمى على عودة الرئيس المنتخب و لا مفاوضات بدون عودة مرسى
تعيشوا وتتخموا
طب تعالوا ببقى نهرى شوية فى الشكل المحتمل للأتفاق الجديد:
مبدئيا كده مفيش ترشح للأخوان تانى على منصب الرئيس
ثانيا مفيش رئيس حكومة حييجى منهم
ثالثا: سيترك لهم الأستحواذ على نسبة لا بأس بها فى الانتخابات البرلمانية
رابعا:سيظل دخول الكليات العسكرية جيش وشرطة محرم على الأخوان
خامسا: الجيش دولة داخل الدولة وله كلمة مسموعة حينما يدعو لحوار بين أطراف الحكم والمعارضة أين ما كانت هويتهم ولن يتكرر أن يدعو الجيش لحوار ويرفضه أحد الأطراف كما حدث فى الأستفتاء على الدستور سابقا
سادسا: تعهد صريح بعدم التعرض للمسيحين بالتحريض أو بالتمييز
سابعا: سيتم تقاسم السوق المصرى بين رجال أعمال الوطنى والأخوان والسلفيين حتى يكون هناك توازن بين الثلاث بما سوف ينعكس على تمويلهم السياسى وتأثيرهم فى سياسات البلاد
ثامنا: تعهد تام بعدم تدخل التنظيم الدولى فى الشأن المصرى بتاتا وسينعكس هذا على العلاقات مع تركيا بالأخص
تاسعا: وزير الدفاع تعيينه من قلب المؤسسة العسكرية وسوف يكون فقط للرئيس التصديق الشكلى عليه "كما فى انتخاب البابا ".
عاشرا: يتعهد الأخوان بعدم المساس بالأزهر وشيخه
11: لا خروج لطلبة الأخوان المحبوس عليهم فى أحداث الشغب وأنما قد يمكن تخفيف الأحكام
12: السلطة القضائية مستقلة ولا مكان لأى عبث دستورى قادم من نوعية الأعلانات الدستورية الرئاسية أو البرلمانية
13: تعهد بعدم المساس بالمخابرات العامة والعسكرية ولها معاملة قريبة من معاملة الجيش ولكن ليس بذات القدسية
14:لا تكليف للمخابرات أو الجيش بأى عمليات لا شأن لها بمصر ولن تخضع المؤسسات الأمنية لأى محاولة لركوب أعضاء الأخوان أو رجال مواليين لها على قمة هذه الأجهزة
15:معظم النقاط السابقة سترتبط مباشرة برئيس السلطة التنفيذية "الرئيس القادم ورئيس وزرائه" لذا سيمنع ترشح الأخوان عليه
16: أختيار الرئيس سيأتى بالتوافق من وراء الكواليس بين الجيش ومختلف القوى السياسية و سيرتبط الرئيس بحزمة تعهدات لهذه القوى وللجيش وسيلتزم بتنفيذها
17:من المرجح أن يكون الرئيس من قوى اليسار ومستبعد أن يكون من العسكر (فقط سيتم التلويح برجل عسكرى فى حالة عدم أبداء المرشحين السياسين للمرونة اللازمة)و فى المقابل سيتم تمهيد الطريق لمن (يحصل على قبول مبدئى و يوعد تعهدات ) ولكن لن يكون هناك تسهيل أو دعم ((يعنى ستقل الشائعات المدمرة سياسيا ولو فيه أى فضائح من أى نوع لن يتم أشهارها وأنما ستستخدم كورقة ضغط لاحقا ....و لاحظ معى من فضلك أن القوانين المصرية لم تدع لك فعلا الا وجرمته بصورة أو بأخرى فغالبا غالبا حتكون واقع فى غلطة كده ولا كده...مش لازم غلطة أخلاقية زى ما انت فاكر أنما ممكن مثلا مشكلة فى شراكة مع رجال اعمال ... أو تلقى تمويلات حتى وان تم أستخدامها فى أغراضها وهكذا
18:سيكون هناك أتجاه لضخ دماء جديدة فى الحياة السياسة المصرية من الشباب وبقوة (هناك كلام بتمكين الشباب من حوالى ربع المحليات وربع أخر للمرأة ...والغرض تفتيتت القوة الأنتخابية لتيار الأسلام السياسى وسحب طاقة الشباب للمناهدة مع سلطة أخرى غير الجيش ""الذى بالمناسبة لن يحكم من وراء الستار كما سيندفع البعض ويقول ذلك")
19:الجيش سيكون رمانة الميزان بين الرئيس والمعارضة و ذلك فقط فى الازمات الكبرى كما حدث فى الاستفتاء على الدستور 2012
20-ربما يتم وضع بروتكول للتنسيق بين المخابرات و أمن الدولة وتظل خيوط كثيرة فى أيدى العسكر بهدف أبقاء بعض الاوراق الرابحة للضغط على أى سلطة قادمة وليس لتحريك الدولة من وراء الستار وسيكون ذلك للحفاظ على مكاسبهم وأيضا بنفس الدرجة الحفاظ على الدولة المدنية المتوارثة من ظابط الجيش عبد الناصر
والله ورسوله أعلم
و ده الكلام اللى كنت بقوله أمبارح

فرسكا ...........أندهش

*كان أبى "ولازال" يتمتع بشىء عجيب للغاية : ألا وهو قدرته على الأنبهار و الأندهاش و التعجب من أى معلومة أقولها وخاصة بعد الثورة.

لحد هنا وقد تعتقد أن الأمر طبيعى لعلّى أكون"والعياذ بالله" قد أكون أسرد له معلومات قيّمة جديدة أو أنى اذكر شيئا لم يكن واضحا أو معلوما من قبل .

المشكلة الحقيقة انى غالبا ما أكون قد رددت هذه المعلومة سابقا ما يقرب من 3 مرات على الأقل.

تضيىء فى عقلى فكرة لعينة ..لابد و انه الزهايمر" أبدأ اللطم بحماس شديد" ثم أتذكر انه يتمتع بهذه الصفة طوال عمره و أنه ليس بالزهايمرفيهدأ بالى.

أذن أنه ليس الزهايمر

*ثم أتذكر والدتى ...أمى حفظها الله حتى وقت قريب كانت لا تنسى شىء " والنساء بوجه عام لا ينسين أى شىء على الاطلاق ودائما ما تتصدر الاشياء التى ضايقتها المرتبة الأولى فى ذاكرتهن عدا ما تفعله من اشياء مبهجة من أجلهن فلا يتذكرنها أبدا

والدتى لا تندهش حين تسمع منى معلومة جديدة أو استنتاج يخص الحياة العامة كوالدى ولكنها تظهر أهتمام شديد بما أقول ينم عن سماعها لهذا الكلام للمرة الأولى فى حياتها "على الرغم من أنى أكون متأكدا و بشدة من تكرارى هذا الكلام من قبل مرتين على الاقل"

*ثم أن باقى العائلة تمارس هذه الحركة بطريقة ممنهجة "أقول الكلام للمرة ال20 فيظهر أنه يسمعوه للمرة الاولى فى حياتهم"

*أما أصدقائى  وزملائى فيبدوا أهتمامهم الشديد وتقديرهم لهذه المعلومات الجديدة لانج بالنسبة لهم "المكررة لهم عدة مرات من قيل"

هل عرفت السبب فى هذه المشكلة بعد اللى حكيته لك؟؟

ولا انا وحياتك ...أما انهم قرورا أن يبعثوا بى الى الجنون أو انها مؤامرة كونية لوذعية على عقلى المسكين او أن الناس حين يستمع احدهم الى كلامى لابد وانه يكون فى عالم تانى

لذا فقد قررت ان اقلب السحر على الساحر وهأنت ترانى أرفع حاجبيى فى اندهاش شديد فاتحا فمى على مصراعيه تعجبا من كلام أهلى الذين يطلبون منى طلبا معينا للمرة الدشليون و انا اظهر أنى اسمعه للمرة الأولى فى حياتى!!!!!

أما أصدقائى فعندما يتحدث معى أحدهم مرددا على مسامعى كلامه للمرة التلاتين فأقاطعه فى ملل شديد موضحا أنه قد قال هذا الكلام مئة مرة ورددت عليه 150مرة من قبل فلا داعى للأسترسال ولننتقل الى موضوع أخر يتحدث هو فيه لكى أقاطعه مرة اخرى وهكذا أستمر فى حرق دمهم واحدا وراء الأخر كما فعلوا بى.........

الاستثناء الوحيد لهذه القاعدة لا يتجاوز 3 أو 4 أشخاص و أفكر جيدا فى عمل جائزة تشجيعية لهم مكأفاة منى على تذكرهم لكلامى.